今年巴士路線計劃建議 N283 (尖沙咀東麼地道 → 黃泥頭) 改道，經油麻地及旺角後，改行西九龍走廊落美孚，停靠美孚地鐵站及饒宗頤文化館，再駛上青沙公路，行回原線往沙田。班次及收費不變。

雖然睇落幾新奇，其實都值得嘗試。現時新界嘅通宵巴士網絡，絕大多數都係往來港九嘅「南北走向」路線，「東西走向」嘅路線極少。而美孚作為九龍西部最大嘅通宵交通樞紐，亦都冇車去新界東，方案中嘅N283就可以做到呢個功能。

既然有意增停美孚，唔知巴士公司同運輸署會唔會考慮N283入埋沙田市中心，駁通一東一西兩個樞紐呢？如果能夠將九龍西嘅乘客接去沙田市中心，仲可以轉到唔同通宵交通去新界東各區，連轉的士駁腳都方便得多，效益將會更上層樓。

預計實施: 2026第4季