មជ្ឈមណ្ឌលកម្ពុជាដើម្បីស្រាវជ្រាវផ្លូវសូត្រសមុទ្ររបស់RUPP ដំណើរការជាផ្លូវការ
- ថ្ងៃអង្គារ ទី១៤ ខែមិថុនា ឆ្នាំ២០១៦ ម៉ោង ៨:៥៩ នាទី យប់
សម្តេចនាយករដ្ឋមន្ត្រី ហ៊ុន សែន នៅថ្ងៃទី១៣ ខែមេសា បានសម្ពោធជាផ្លូវការនូវ « មជ្ឈមណ្ឌលកម្ពុជាដើម្បីស្រាវជ្រាវផ្លូវសូត្រសមុទ្រ » របស់សាកលវិទ្យាល័យភូមិន្ទភ្នំពេញ។ មជ្ឈមណ្ឌលនេះ នឹងស្រាវជ្រាវ ពីដំណើរការនៃគំនិតផ្តួចផ្តើម«ផ្លូវសូត្រសមុទ្ររបស់ចិនសតវត្សរ៍ទី២១»ដែលជាប់ពាក់ព័ន្ធជាមួយនឹងកម្ពុជា និងដៃគូផ្សេងទៀតដើម្បីផ្តល់ជាអនុសាសន៍សម្រាប់ការបង្កើតនយោបាយឲ្យត្រូវនឹងទិសដៅ និងទទួលបានផលប្រយោជន៍ជាមួយនឹងគំនិតផ្តួចផ្តើមនេះ។
លោក នាក់ ចិន្តារិទ្ធិ ប្រធានមជ្ឈមណ្ឌលកម្ពុជាដើម្បីស្រាវជ្រាវផ្លូវសូត្រសមុទ្រ(CMSRRC) បានថ្លែងប្រាប់សារព័ត៌មានថ្មីៗ ថា មជ្ឈមណ្ឌលកម្ពុជាស្រាវជ្រាវវិថីសូត្រសមុទ្រ ត្រូវបានបង្កើតក្រោមការផ្តួចផ្តើមដោយសាកលវិទ្យាល័យភូមិន្ទភ្នំពេញ។ ការបង្កើតនេះ មានគោលបំណងគាំទ្រនូវទំនាក់ទំនង និងសម្រួលឲ្យបានដល់ការយល់ដឹងអំពី«វិថីសូត្រសមុទ្រ»។
លោក នាក់ ចាន់ដារិទ្ធ ដែលជាប្រធានស្តីទីនៃដេប៉ាតឺម៉ងសិក្សាអន្តរជាតិនៃវិទ្យាស្ថានភាសាបរទេស សាកលវិទ្យាល័យភូមិន្ទភ្នំពេញផងដែរនោះ បានលើកឡើងថា ការបង្កើតមជ្ឈមណ្ឌលនេះ ក៏ជាការចូលរួមចំណែកក្នុងការអភិវឌ្ឍប្រទេសតាមរយៈការស្រាវជ្រាវបន្ថែមដើម្បីផ្តល់អនុសាសន៍សម្រាប់ការបង្កើតគោលនយោបាយ។
តាមការបញ្ជាក់របស់លោក នាក់ ចាន់ដារិទ្ធ ប្រតិបត្តិការរបស់មជ្ឈមណ្ឌលសូត្រសមុទ្រមានគោលដៅធំបីរួមមាន ការសិក្សាស្រាវជ្រាវ បណ្តុះបណ្តាលនិស្សិត និងមន្ត្រីរាជការ និងរៀបចំវេទិកាសិក្ខាសាលា សន្និសីទដើម្បីចែករំលែកចំណេះដឹង និងផ្តល់អនុសាសន៍ដល់អ្នកបង្កើតនយោបាយទាក់ទង ជាមួយនឹងវិថីសូត្រសមុទ្រដែលជាគំនិតផ្តួចផ្តើមថ្មីរបស់ចិនដែលកម្ពុជាបានចួលរួមចំណែកផងដែរនោះ។
សម្រាប់ ការការបណ្តុះបណ្តាលនិស្សិត លោក បានបញ្ជាក់ថា ក្នុងជំហានដំបូង នឹងផ្តោតតែលើនិស្សិតសាកលវិទ្យាល័យភូមិន្ទសិន ហើយ សម្រាប់មន្ត្រីរាជការ ផ្តោតតែលើមន្ត្រីដែលបម្រើការទាក់ទងនឹងគម្រោងនេះ។ លោក សង្កត់ធ្ងន់ ថា ការបណ្តុះបណ្តាលនេះ នឹងជួយធ្វើឲ្យមន្ត្រីក្លាយជា«មន្ត្រីជំនាញទំនាក់ទំនងតភ្ជាប់ក្នុងគំនិតផ្តួចផ្តើមវិថីផ្លូវសូត្រ។
តាមការអះអាងរបស់លោក នាក់ ចិន្តារិទ្ធិ បន្ថែមពីការស្រាវជ្រាវដែលបានកំណត់កំណត់ក្នុងគោលការ ណ៍ បច្ចុប្បន្ន CMSRRC ក៏កំពុងតែសហការជាមួយនឹង Hong Kong Institute of Asia-Pacific Studies ក្នុងការសិក្សាស្រាវជ្រាវក្នុងគម្រោងនៃការអភិវឌ្ឍ និងកត្តាប្រឈមនៃការវិនិយោគហេដ្ឋារចនាសម្ព័ន្ធរបស់ចិននៅក្នុងតំបន់អាស៊ានផងដែរ។
គួរបញ្ជាក់ផងដែរ មជ្ឈមណ្ឌលកម្ពុជាដើម្បីស្រាវជ្រាវផ្លូវសូត្រសមុទ្រ ក៏នឹងផ្សព្វផ្សាយ និងបណ្តុះបណ្តាល ពីគោលនយោបាយសេដ្ឋកិច្ច ខ្សែក្រវ៉ាត់មួយ និងវិថីមួយដែលផ្តួចផ្តើមគំនិតបង្កើតឡើងដោយ ប្រធានាធិបតីចិន លោក ស៊ី ជិនពីង ផងដែរ។ គំនិតផ្តួចផ្តើមរបស់លោកស៊ី ជិនពីងដែលបានបង្កើតឡើងតាំងពីឆ្នាំ២០១៣ មានគោលដៅលើកកម្ពស់ សកម្មភាពសេដ្ឋកិច្ច ពាណិជ្ជកម្ម និងបង្កើនការផ្សាភ្ជាប់ រវាងរដ្ឋពាក់ព័ន្ធសរុប៦៥ និងមហាយក្សចិន ដោយផ្តោតលើការអភិវឌ្ឍហេដ្ឋារចនាសម្ព័ន្ធ និងសមាហរណកម្មតំបន់ពីអឺរ៉ុបទៅអាស៊ី និងបន្តទៅអាហ្វ្រិកទៀត៕
© រក្សាសិទ្ធិដោយ thmeythmey.com
Tag:
