創校至今已經150週年嘅聖若瑟書院，近日聯同Tramplus叮叮科創，將編號#150嘅電車，變身成為「聖若瑟電車」。喺未來一個月裡面，呢部主題電車將會擔當聖若瑟書院嘅宣傳大使，將150週年校慶嘅呢份喜悅，沿電車路傳遍港島多個角落。

喺成長路上經常接觸到香港電車嘅聖若瑟書院校長郭迪民，形容學校同電車之間嘅關係相當親切。除咗因為兩者同時都係香港嘅「百年老店」之外，就連雙方採用嘅代表顏色，都係以深綠色作為主調。加上唔少學生都會搭電車往返學校，喺種種因素驅使之下，最終就促成今次雙方嘅合作項目。郭迪民希望透過今次活動，可以為學生提供一個展現天份同埋專業水平嘅實戰經驗，從而提升佢哋嘅藝術水平。至於喺普羅大眾嘅角度，郭迪民就提醒大家，一定要留意出現喺右邊車身廣告上面嘅一隻松鼠，同埋一個足球。因為喺佢哋嘅背後，其實係蘊藏住唔少聖若瑟書院校友嘅集體回憶。

呢個電車車身廣告其中一個特色，係部份圖案採用咗手髹方式上油，而有別於今時今日大行其道嘅車身貼紙。有份參與設計呢個電車廣告嘅聖若瑟書院學生劉智仁、蘇朗，同埋陳卓𤋮，坦言喺今次合作過程當中，由於經常要面對題材上嘅取捨，所以少不免會發生一啲磨擦。單係要將上下層嘅圖案串連起嚟，過程已經足以令佢哋要費煞思量。不過當佢哋最終親眼見到呢個電車廣告面世之後，唔單止感到極有滿足感，而且亦覺得自已同香港電車嘅距離，進一步拉近咗。

呢部「聖若瑟電車」將會喺今個星期六，接載一眾聖若瑟書院嘅師生同埋校友，沿住電車路巡遊香港島，務求令到呢間學校嘅150校慶，可以達致與眾同樂。

#叮叮科創