[口岸巴士線加價幅度遠超平均💸]
意圖節省$2補貼的自相矛盾

政府批准巴士加價，各條路線新收費經已公布。當中口岸路線引起網民熱議，呢類路線全部高過該公司平均加幅。城巴B8 (大圍站 - 香園圍管制站) 全程收費由$16.1加至$18.1，上調12.4%💥，加幅屬於全港前列，而城巴整體加幅係7.5%。

沙田嘅街坊都知道B8出咗名多長者搭，最近一篇新聞估計長者佔比高達九成。加價後政府向每名65歲以上長者嘅補貼額增加$1。城巴並無為60-64歲嘅乘客提供半價優惠，所以政府要補貼哂$2嘅加幅。

近年$2搭車優惠支出節節上升，政府不斷向長者宣傳，「教育」長者搭啲平嘅車，同一時間卻容許口岸路線加幅遠超平均，長者就繼續離境消費。情況就好似呼籲市民慳啲用水，但係條街就爆食水渠💦

另一邊廂，當局認為「長車短搭」令補貼金額大增，都係因為長者搭啲貴價路線喺區內落車，導致不必要嘅補貼支出。其實翻查減班數據，唔難發現沙田區嘅區內短途線削減得特別嚴重。

沙田一共有183條巴士線，其中全日服務嘅區內線有19條，主要用途係接駁鐵路及往返社區設施，照計客量相當穩定。過去3年沙田一共減班200次，然而區內線差唔多每條平均減咗兩次💩。

當局批准連環減班，令短途線服務質素急劇下降，久而久之長者梗係習慣搭比較密車嘅長途線，又再推高補貼金額。居民嘅乘車體驗每下愈況，最後連全費嘅乘客都經常被逼搭長途車往返區內。

IG: https://instagram.com/shatin_transport
更多內容: https://linktr.ee/shatintransport