經過超過一個月嘅激烈投票，有間大學只以一票之差飲恨做亞軍 ? 今次最有運動細胞大學嘅投票結果，就係由PolyU以一票之微勝出！而HKU就以一票之差飲恨！

一票險勝稱王 : 理工大學 PolyU

理工大學一向都係大專體育比賽嘅長勝將軍，運動細胞爆棚！選手入面更有陳健安(On仔)曾經係香港足球聯賽甲組足球員，仲係C Allstar嘅成員之一，文武雙全！仲有港隊游泳代表譚凱琳喺杭州亞運4x100米混合泳接力賽刷新香港紀錄，為港隊奪得一面游泳銅牌！

 

一票飲恨排名第二 : 香港大學HKU

港大運動界人才輩出，當中有現役香港跳高代表楊文蔚﹑更有香港網球界明日之星黃澤林，港大咁多運動設施，相信一定係咁有運動細胞嘅原因！

排名第三 :中文大學 CUHK

中文大學雖然要排第三，但都有接近兩成嘅得票！會唔係因為成日都可以跑山所以令到啲學生都充滿運動細胞 ? 中大嘅代表有香港跳遠女將俞雅欣，杭州亞運會摘銅兼破香港紀錄！仲有「世一」劍擊女神江旻憓都係中大校友！

同場加映: 最佳參與獎

會大學都有超過一成得票！雖然唔係運動員， 但小編私心想po都大校友魏浚笙Jeffrey BB，佢拍《I SWIM》嗰陣真係好charm <3

 

 最文青大學！

 今次【最文青大學投票】每間大學嘅票數都相當接近，競爭相當激烈！最終中大以三成嘅票數榮登冠軍寶座，第二名同第三名只係差一票咋😵

 

排名第一 : 中文大學 CUHK

三成得票登上寶座

新亞beat喺大學dem beat界係傳說一樣嘅存在，Dem beat其實好考填詞人嘅功力，少啲文學修養都唔得，最文青大學當之無愧！

 

 

排名第二 : 嶺南大學 LingU

LingU 其實卧虎藏龍，人才輩出！今次都有兩成得票，近年嘅文青天花板一定非林家謙莫屬！仲有演員盧鎮業同小薯茹嘅朱mic都係嶺大畢業！

 

 一票飲恨第三 : 香港浸會大學 HKBU

浸大一向都係文青集中地，近年代表人物一定係文青女神袁澧林，組合Mirror嘅阿Jer同Tiger，都係浸大畢業, 絕對唔嘢少！

 

 

 唔知點解排名第三 : 理工大學 PolyU

 PolyU鄰近紅磡同黃埔應該大把好西食！? 有冇PolyU人現身說法解釋下，其實係咪有咩不為人知嘅辛酸? 

 

最靚Campus大學！

今次【最靚campus大學】由中大以兩成票數跑出，成為最靚campus大學！

排名第一 : 中文大學 CUHK 

中大必到嘅打卡位 —— 「天人合一」, 相信大家冇去過都聽過, 仲有好多人慕名而嚟影pre-wedding添！被選為「最靚campus」當之無愧！

 

 

排名第二 : 香港大學 HKU

HKU作為香港歷史最悠久嘅學府, 周圍都充滿古典氣息！當中「本部大樓」屬愛德華式建築, 係其中一個最受歡迎嘅打卡點，大樓外部更加自1985年起成為香港法定古蹟添！

 

排名第三 : 理工大學 PolyU

而家潮流興工業風，PolyU作為「紅磚大學」一定係當中嘅佼佼者！仲有一棟充滿科幻感嘅賽馬會創新樓，好多人都會喺創新樓打卡！

 

最有音樂細胞大學

今次【最有音樂細胞大學】由中大以接近兩成票數跑出，成為最有音樂細胞大學！

 

排名第一 : 中文大學 CUHK 

原來校園嘅景色特別靚可以觸發到靈感？中大係最早頒授音樂系學位嘅本地大學，音樂系嘅資源亦都好豐富，擁有屬於自己系嘅圖書館！

 

排名第二 : 浸會大學 HKBU

浸大設有全港第一同唯一一個獲教資會資助嘅「創意產業音樂學士（榮譽）」課程，更加有學生未畢業已經成立咗自己嘅發行公司同為歌手擔任音樂總監！

 

排名第三 : 理工大學 PolyU

 理工大學原來音樂細胞都有翻咁上下！歌手有Mirror嘅Frankie同Moon Tang之外， 仲有新生代填詞人Oscar Lee，音樂細胞一樣爆棚！

 

最識食字大學

今次【最識食字大學】由中大以接近一成五票數跑出，成為最識eat word嘅大學！

 

排名第一 : 中文大學 CUHK 

中大人果然有文采同幽默感，個書院名俾佢哋玩到出神入化，長期冧莊大學の最睇嚟唔係冇原因

 

排名第二 : 城市大學 CityU

城大隻佬有好多支持者，小編表示要去CityU驗證下，啲大隻仔係未都叻食字

 

並列第三 : 都會大學 HKMU 同 聖方濟各大學 SFU

 都大同聖大同運動有關嘅學會都係食字大師，跳開舞、打開波係咪零舍醒? 有冇同學仔出嚟現身說法?

 

最有Fashion Sense 大學

排名第一 : 理工大學 PolyU 

理大設計系一向走喺「潮流尖啄」，好多artist 都係佢地嘅fans，訓喺度都贏！

 

排名第二 : 中文大學 CUHK

中大人竟然用小畫家整咗一件咁脫俗嘅作品，小編真心想買返一件著 :D

 

排名第三 : 恒生大學 HSUHK

恒大大學校隊每年會設計隊服，配色同質感都十分出色，連大學吉祥物都係由師生設計！

 

最啱靈探大學

排名第一 : 中文大學 CUHK

中大依山而建又多小徑，最適合做鬼故嘅場景，當中最多人講嘅一定係「辮子姑娘」

 

排名第二 : 嶺南大學 LingU

嶺大周圍有零星嘅山墳墓地，所以鬼故同靈異事件特別多，淨係個「永別亭」已經勁啱靈探

 

排名第三 : 樹仁大學 HKSYU

樹大原來都真係招風，不過係陰風個風🥶 喺campus盪失路，即刻怯一怯......

 

最有口福大學

 

排名第一 : 城市大學 CityU

CityU canteen出名高汁，格離仲有又一城同南山邨食西餐得，掃街又得，肥廿磅不是夢

 

排名第二 : 中文大學 CUHK

中大有近40間食堂同餐廳，日式﹑西式﹑飲茶應有盡有！小編就推介壽喜燒同酸菜魚~

 

排名第三 :  理工大學 PolyU

理大多咗餐廳進駐，連韓式打卡cafe都有，附近置富都會同黃埔都大把好嘢食！

 

呢個投票結果你又認唔認同？我哋之後會繼續舉辦「大學の最」嘅投票，全部都係你最有興趣嘅題目，你諗得出嘅就有可能發生！邊間U係最潮/最yo/最文青/最IGable？就靠你手上一票嚟決定！希望除咗反映各間大專院校喺學生心目中嘅形象，更成為準DSE生選校嘅另類指南！

想知道更多大學秘聞？快啲click落下面link知多啲！

相關閱讀:

【會員福利署】Y.X Community會員專屬優惠！