細個嗰陣住過一年德福花園，每當列車由彩虹駛往九龍灣，總會向右「沿途望出車外」，見到車廠中豎立一座三層樓嘅塔（三層塔）。一來知道自己好快返到屋企，二來都會好奇呢座塔有咩用途。呢個2002年得8歲嘅小學生心諗：如果大個有機會入去，睇住啲列車走嚟走去就好了。佢點都無諗過全家搬離德福廿年之後，居然獲 MTR 邀請上去呢座控制塔，俯瞰九龍灣車廠以及周邊景色。

呢座塔型建築，其實係九龍灣車廠第一代車廠控制室，隨修正早期系統1979年通車而同時投入運作。控制室屹立於車廠北部具戰略性位置，能夠讓車廠營運主任望清車廠以及附近道路情況，以適時調度廠內列車及工程車。控制室中央則設有控制面板，車廠營運主任可以為各種車輛設定路線，讓車長按照該路徑將車輛駛到廠內特定位置。控制面板上貼有各式各樣寫有機車編號嘅磁石貼，讓車廠營運主任了解當刻於路軌上嘅車列組合；也配備能夠覆蓋部分按鈕嘅模具，避免誤碰按鈕。然而控制塔內辦公空間有限，車廠唔同範疇嘅人員分散於廠內各處。為集中人員以便於車廠運作及溝通，九龍灣車廠嘅車廠控制室於2003年遷到其他位置，自此控制室人去樓空，入面嘅環境猶如停留於二十年前。

舊年為 空城記 Empty City 《空城記》一書代序時曾經提到，「遺落在廢墟當中的物品，則反映用家離場時如何作斷捨離。留下來的物件側面反映那時那刻的時代風貌，幸未有被時代巨輪推進而消失。」先旨聲明，港鐵安排大家參觀控制塔前必然有清潔及打掃，並不如大家想像嘅「廢墟」咁滿目蒼夷、佈滿塵埃同蜘蛛網。但呢個停用二十年嘅房間，仍留有早年各種佈告及設備。門口上方掛有以打字機編印嘅中英文版「員工評議會守則」、牆上貼上2001年嘅海報。員工儲物櫃外則貼有90年代初機場鐵路項目貼紙，而另一組鐵櫃則放置幾本相信存放圖則嘅紅色硬皮文件夾。電器方面，「大牛龜」電視機、電風扇以及傳真機仍存放於控制室內。

細個對呢座塔嘅不解之謎已大致解開，之後當然要於幾近無死角嘅觀景窗睇車輛調度，同埋列車點樣駛過洗車機以進行清潔。影完相、參觀完之後，一行人再次登上列車返回彩虹站中間月台。

- - - - - - - - - -

鐵路運作除咗日常生活接觸到嘅車站、軌道及列車外，仲有車廠、控制中心以及各種輔助設施。隨著鐵路發展，昔日列車頻繁來往嘅路段或因新鐵路通車而停用，部分設備也因技術進步而逐步淘汰，個別為未來項目預留嘅空間有機會因規劃轉變而未能用上。倫敦有「Hidden London」，香港同樣有潛力發展鐵路主題嘅秘景團。港鐵能否打開呢啲鮮為人知空間嘅神秘面紗，讓大眾了解香港歷史或發展呢？更重要係，衷心希望呢次「港鐵隱藏秘景探索隊」並非期間限定嘅宣傳活動，而係一個可持續進行嘅系列，讓更多朋友於安全嘅情況下參與其中。

#火車未到站 #港鐵隱藏秘景探索隊 #九龍灣車廠 #九龍灣

#2022年星期日明報訪問有提過住德福

#住德福嗰段日子睇住彩虹站中間月台裝幕門

#56K上網睇鐵路資訊好奇點解觀塘綫點解之後無得過海