香港GTFS交通數據討論

相關舊帖：
https://www.hkitalk.net/HKiTalk2/thread-1087155-1-1.html

話說香港政府喺2018年開始生產GTFS時間表，之前我喺2019年裝過個 OpenTripPlanner 玩下睇下啲資料點，但之後因為服務器成本都無再維護。

直到2023年，我喺倫敦搵到份工，就真係用 OpenTripPlanner 去整行程規劃應用程式，事隔一年半，而家個後台嘅火車資訊準確度已經超過 Google 同 Citymapper ，而間公司亦最近已經攞到 VC funding 。以下係一啲截圖：



咁隻 app 雖然目前仍然重喺測試階段，個市場亦只限喺英國，但我已經改善到可以喺唔同時區用唔同服務器都無問題，包括挪威、芬蘭等等。既然已經有隻 app ，我而家自己又有服務器資源，咁我而家裝返上去玩下（雖然個服務器係VPS，所以好慢，只適合用來測試用）。

我直接用政府嘅 GTFS 入 OpenTripPlanner ，結果呢？啲結果勁恐怖，完全不切實際。

舉例：

旺角道（904站對面）去童軍總部，我預期係一面倒叫我搭地鐵，建議結果係搭3號小巴。原因：資料入面一條地鐵都無！



港大黃克兢樓去兆軒苑，星期一17:20出發，我預期大約要75分鐘，建議結果係全個行程45分鐘！原因：個系統覺得西隧口去屯門轉車站係1分鐘嘅事！



唔單只咁，政府嘅GTFS啲站名係炒埋一碟，啲路線又無頭牌（headsign），又無顏色，又無善用 translations.txt 來提供中英對照。
我個 OpenTripPlanner 服務器喺 https://transport.miklcct.com/ ，大家可以玩下，不過真係好慢，幾分鐘先出到結果，同埋用佢個 GraphQL 睇下啲資料；呢個係服務器問題，唔關軟件事。

至於民間資源呢？你大家睇下所謂「共筆型」網站，香港巴士大典嘅資料，同埋民間嘅應用程式 https://hkbus.app/ 以及 https://github.com/alvinhkh/buseta 等等贏過政府啲垃圾九條街。睇來如果我哋可以運用呢啲資源，整個合作社（Co-op）去整返個民間版 GTFS （隨時可能可以交埋上 Google Maps ），咁對全港市民都有好大幫助，無論係普通乘客定係交通規劃師，同埋可以用來恥笑香港政府嘅所謂開放數據。

香港嘅巴士服務比英國至少先進25年，地鐵服務比英國先進100年（我估啦，唔知100年以後英國地鐵全線有齊 step free 同埋幕門未呢？），但係資訊流通方面，卻比英國落後10年有多。

歡迎討論。

呢個咪叫你保鐵


不過個人經驗
之前A19版有人出左D都棘手問題
去用例如POKEGUIDE去搵
結果都係麻麻地
有D本身有既OPTION無考慮在內

要整呢D野首先要有香港交通完整世界觀
另外DATA MANAGEMENT可能都要執過晒統一返所有野
呢D EFFORT同成本都襟計

反而政府叫你用香港出行易
城巴九巴叫你各自用返佢地APP
暫時邊個好用咪用邊個

kay 發表於 2024-10-19 08:26
呢個咪叫你保鐵

GTFS格式係世界標準，即係無論邊個國家嘅軟件，只要支援呢個格式，都可以讀到世界各地嘅交通數據。
想其他國家嘅軟件開發者喺引入全世界數據時事先理解香港交通系統並特意為香港交通系統調整，有幾多開發者會有咁多能力去做？