ភ្នំពេញ ៖ វិស្វករផ្នែកគូរប្លង់ជនជាតិកូរ៉េម្នាក់ ត្រូវបានកម្លាំងនគរបាល នៃអធិការដ្ឋានខណ្ឌដូនពេញ ធ្វើការឃាត់ខ្លួន ដោយបុរសជនជាតិកូរ៉េរូបនោះបានលាក់ទុកសារធាតុញៀនចំនួន២កញ្ចប់នៅជាប់ខ្លួនរបស់គាត់។
ការឃាត់ខ្លួនជនសង្ស័យជនជាតិកូរ៉េរូបនោះ បានធ្វើឡើងកាលពីវេលាម៉ោង១០ព្រឹក ថ្ងៃទី២៤ ខែកក្កដា ឆ្នាំ២០១៩ ចំណុចផ្សារសូរិយ៉ាម៉ល ផ្លូវ៥១ ភូមិ១១ សង្កាត់ផ្សារផ្សារថ្មី៣ ខណ្ឌដូនពេញ។
សមត្ថកិច្ចផ្នែកជំនាញគ្រឿងញៀន នៃអធិការដ្ឋានខណ្ឌដូនពេញបានឲ្យដឹងថា ជនសង្ស័យ ឈ្មោះ YUICHI HATAMURA (យូអីឈី ហាថាម៉ូរ៉ា) ភេទប្រុស អាយុ៣៨ឆ្នាំ ជនជាតិកូរ៉េមុខរបរវិស្វករគូរប្លង់ ស្នាក់នៅផ្ទះលេខ២៦៤ ផ្លូវ៥១ សង្កាត់បឹងកេងកង ខណ្ឌចំការមន។ រីឯវត្ថុតាងចាប់យករួមមាន១/ក្រាមពណ៌សរថ្លា សង្ស័យជាគ្រឿងញៀនចំនួន០២កញ្ចប់
២/ប្រាក់ដុល្លារចំនួន៦០ដុល្លារ ប្រាក់រៀលចំនួន៣០០០(បីពាន់រៀល)។
សមត្ថកិច្ចផ្នែកជំនាញបានឲ្យដឹងទៀតថា មុនពេលឈានដល់ការឃាត់ខ្លួនជនសង្ស័យរូបនោះ គឺកម្លាំងជំនាញបានដាក់កម្លាំងសម្ងាត់នៅបរិវេណផ្សារសូរិយាម៉ល ខណៈនោះ ក៏បានប្រទះឃើញនូវបុរសជនជាតិកូរ៉េរូបនោះ ដែលមានការសង្ស័យ ក៏នៅធ្វើការឆែកឆេរទៅឃើញមានលាក់ទុកនៅសារធាតុញៀនចំនួន២កញ្ចប់នៅជាប់ខ្លួនរបស់គាត់នោះ ក៏បាននាំខ្លួនមកអធិការដ្ឋានខណ្ឌដូនពេញដើម្បីសួរនាំតែម្តង។
ចំពោះមុខកម្លាំងជំនាញខណ្ឌ ប៉ុស្តិ៍ កំពុងយកចម្លើយបន្តស្រាវជ្រាវរកបក្ខពួក និង ក្រុមដទៃផ្សេងទៀត ព្រមទាំងកសាងសំណុំរឿងដើម្បីបញ្ជូនទៅសាលាដំបូងរាជធានីភ្នំពេញអនុវត្តតាមនីតិវិធី និងទិសដៅបន្ត អធិការដ្ឋាននគរបាលខណ្ឌដូនពេញ និងប៉ុស្តិ៍រដ្ឋបាលទាំង១១ បន្តជំរុញការស្រាវជ្រាវដើម្បីបើកការបង្ក្រាបជាប់ជាប្រចាំ៕
ដោយ ៖ រស្មី
