聯合出版集團背後小故事
最近大家都講三中商，其實《壹周刊》都一早已經踢爆左，三中商背後既聯合出版集團，就係由中聯辦經兩層架構揸住股權，間接控制住成個三中商既出版帝國。而呢排港台既《鏗鏘集》，就重新再做過呢個主題，再引起牽連大波。
上面個架構，其實並唔係新野，因為其實由三聯出版既《香港中資財團》，已經自爆左聯合出版集團本身，就係一間中資財團。
《香港中資財團》呢本書係2009年出版，當中有章節就講到聯合出版集團既故事，就講到三聯、中華同商務既由來，同埋聯合出版集團點解要成立。
喺改革開放之後，中資企業處於大幅擴張期，同時要走向集團化、多元化同國際化「三化」。「三化」浪潮下，三中商同其他品牌就互相整合，組成聯合出版集團。三聯書店本身係中共治下，中國大陸出版喺香港同海外發行既總代理，而中華書局定位就係歷史、中國研究既專門出版社；而商務印書管就係以教科書、印刷同翻譯書為主。喺1980年，中華同商務既印刷廠合併；而1981年，三中商總管理處正式成立，模式就好似中銀喺香港成立總管理處一樣，方便管理同精簡行政。到1988年，聯合出版集團就正式成立，隨後就進軍地產，聯合出版大廈就係呢個時候興建。
值得一睇係，聯合出版集團喺1990年用1.5億全數收購左《香港商報》，99年就將49%股權賣畀深圳特區報集團。（所以上面話好多《商報》股份由董事個人持有，其實就係因為《商報》係沿用舊管理模式，由人頭代表機構持有。）
當然，本書其實有好多野都冇講到，尤其係牽涉政治既部分。唔通一本由三聯自己出版既書，會講到政治部分同三中商既發展咩。
喺1949年中共建國之後，其實有唔少既中國企業將主要經營地同註冊地搬到北京，而香港既部分通常都繼續留低，扮演窗口既任務，當時除左三中商，仲有中銀、招商局等中資企業繼續駐港，繼續扮演中國同世界既中間橋樑。
喺1949年中共建國之前，1946年毛澤東講話時，已經講到「我們現在不提出（英國）立即歸還（香港）的要求，中國那麼大，許多地方都沒有管理好，先急於要這塊小地方幹嗎？將來可按協商辦法解決。」而1949年2月，毛澤東亦講到「恐怕利用這兩地（澳門、香港）的原來地位，特別是香港，對我們發展海外關係、進出口貿易更為有利些。總之，要看形勢的發展再作最後決定。」所以，不論三中商，定係中銀、招商局呢類國企繼續駐港，本身就負起左中共既政治任務，而喺當時英國政府既政策上，中共企業可以繼續低調地生存，扮演中外之間既連結。而1951年，周恩來講到「我們在全國解放之前已決定不去解放香港」，就進一步引證中共對港「長期打算，充分利用」既方針。
而三中商本身，就係執行呢個政策既文化單位。不論係整合香港既中資印刷企業同書店，以及收購《商報》再轉手等既做法，其實就係文化層面既經濟政治工作。
另一樣野想講既，就係僑X系既公司，雖然表面上未必好有關係，但實際上都係中共同一系統既香港公司。北角僑冠大廈係六七暴動時，其中一個鬥委會陣地，喺1965由僑光置業興建，老闆就係南洋商業銀行創辦人莊世平，而原址本身就係商務印刷廠原址，而當時商務既分店亦揀返喺僑冠大廈營運。而聯合出版集團旗下既僑商置業，就有理由令大家相信呢類僑X系既公司，就係有同一來源。大家唔好唔記得，民建聯既總部，其實就係位處僑商置業持有既聯合出版大廈。
要講中共喺香港既經濟部署，真係講十日都講唔晒，今次講少少聯合出版集團既小故仔，先講住咁多，之後同大家分享更多啦。
